Республикэм и Мафэу къэблагъэрэм Мыекъуапэ и Мафи дыхэдгъэунэфыкlыщт. Ащ ипэгъокlэу къалэм апэрэу адыгабзэкlэ экскурсие щырекlокlыщт. Ар зигукъэкlыр «Адыгэ макъэм» ижурналистэу, зекlозещэу Анцокъо Ирин. Экскурсием илъэхъан ащ ынаlэ нахь зытыригъэтыщтыр пэсэрэ Мыекъуапэрэ адыгэхэмрэ.
Апэрэ шlэныгъэ унэу Мыекъуапэ дэтыгъэу Къушъхьэчlэс еджапlэр зыщылажьэщтыгъэр, апэрэ мэщытэу Мыекъуапэ щагъэуцугъагъэр гъогууанэм хэтыщтхэм ащыщых. Экскурсием хэлажьэ зышlоигъохэр lоныгъом и 28-м, тхьаумафэм пчэдыжьым сыхьатыр 10-м къэлэ гупчэ зыгъэпсэфыпlэм ипсыутх дэжь къырагъэблагъэх. Гъогууанэр сыхьатым телъытагъ. Кlэух чlыпlэр Лениным ыцlэ зыхьырэ гупчэр ары.
Экскурсием ыпкlэ лъыптынэу щытэп.
