Лъэпкъ журналистым иеджапlэ щеджэхэрэм "Адыгэ макъэм" ижурналистэу, зекlозещэу Анцокъо Иринэ адыгабзэкlэ экскурсие афызэхищэгъагъ.
Сыдэу тхъагъуа республикэм икъэлэ шъхьаlэ итарихъ адыгабзэкlэ къыпфаlуатэзэ иурамхэм уарыкlоныр!
Адыгэ гущыlэжъхэу къэлэ урамхэм "къатеуцуагъэхэр", лъэпкъ сурэтышlхэм яlофшlагъэхэу унэ дэпкъхэр къэзгъэбаигъэхэр, Мыекъуапэ апэрэ мэщытэу дашlыхьэгъагъэр, урам шъхьаlэу Краснооктябрьскэм тет унэхэу тарихъ гъэшlэгъон зыпылъхэр - бжыхьэ лъэсрыкlо зекlом къыдыхэлъытэгъагъэх.
Журналист сэнэхьатымрэ зекlозещэнымрэ зэдыригъаштэу, афэкъулаеу зэзгъэкlурэ Анцокъо Иринэ лъэпкъ журналистым иеджапlэ хэтхэм непэ ящысэтехыпlэ хъугъэ.
Гражданскэ обществэм хэхъоныгъэ егъэшlыгъэнымкlэ республикэ грантым иlэпыlэгъукlэ лъэпкъ журналистым иеджапlэ ишэмбэт десэхэр лъэкlуатэх.
Тэу Замир/Адыгэ макъ, Хэкум ымакъ
